La Conferenza naziunala davart il federalissem vegn organisada en stretga collavuraziun tranter il Cussegl federal, il Cussegl dals chantuns, la Conferenza da las regenzas chantunalas ed il chantun Tessin. Ella ha la finamira da promover la reflexiun davart l'identitad da la Svizra e da proponer soluziuns concretas a livel politic ed instituziunal per rinforzar il federalissem sco element constitutiv da l'identitad naziunala, en l'adattond als basegns d'ozendi. La terza conferenza è deditgada al tema Il federalissem e las novas sfidas territorialas, quai che vegn a permetter da discutar las profundas transfurmaziuns socialas, economicas, demograficas e culturalas che la Svizra ha subì en ils ultims decennis.

Per far frunt a questa sfida redefineschan e rinforzan la Confederaziun, ils chantuns e las vischnancas la collavuraziun entaifer ed ordaifer ils cunfins naziunals. La finamira da la conferenza è da sa fatschentar cun las pussaivladads ed ils limits da las reacziuns politicas ed instituziunalas actualas, considerond las dinamicas demograficas, il svilup economic, l'appartegnientscha e las identitads territorialas, l'effizienza ed ils princips democratics.

Durant questa conferenza impurtanta, che ha lieu mintga trais onns, refereschan persunalitads svizras e dals pajais cunfinants, activas en la politica chantunala e federala, en l'economia, la scienza e l'administraziun publica. Las novas sfidas territorialas che naschan per il federalissem, ans sforzan dad integrar er vistas da l'exteriur per encleger co ch'il federalissem svizzer vegn recepì e valità ordaifer ils cunfins naziunals.